Liburu berria

JOXE ARREGI
Jainkoa, jaun goikoaz harago. Teologia berri baterako ildoak

Argitaletxea: Feadulta.com, 2025eko urria
Salneurria: 14 €

Erosi nahi baduzu:
Liburu-dendetan
Edo agitaletxera zuzenean eskatuz: www.feadulta.com/libreria
Edo helbide honetara idatziz: jmormazabal55@gmail.com

***

Jainkoa esateak ba ote du oraindik zentzurik? Nola esaten dugun, nondik eta zertarako. Hitz erabat nahasgarria da, eta zoritxarreko historia du zorionekoa bezainbat. Teismo tradizionaleko jainkoak –jaun goiko, mundutik bereiz, izaki goren, kreatzaile ahalguztidun– ez du lekurik gure mundu-ikuskera orokorrean. Jaun goikoaz harago, ordea, ez ote da izaki guztien izamen misteriotsua, ez zerbait ez norbait, baizik den ororen betidaniko sorburu eta sormen, arnasa eta harreman sortzaile?

Ezagutza azeleratuaren, informazio eta ziurgabetasun globalaren, adimen artifizialaren garaian bizi dugun kultur metamorfosiak trantsizio teologiko erabakigarri, erradikal, integrala eskatzen digu, antzinako iruditeria eta sineskizun guztiez harago. Ebanjelioetako Jesusen bizi-esperientzia sakona –anai-arrebatasun libre, errukitsu, alai, sendagarria– inspiragarri gerta dakiguke munduko urradura latz eta mehatxu itzalen artean. Baina kristautasun tradizionalaren tresneria dogmatiko, erritual eta instituzionala zaharkitua geratu zaigu, ez digu balio. Arnasa eta bulkada berria behar ditugu.

Jainkoari buruz modu sinesgarrian eta zientziekiko koherentzian hitz egiteko marko nagusia proposatzen digu autoreak aurrenik. Ondoren, ibilbide historiko bikoitza aurkezten du: nola igaro ziren gizakiak sakratuaren bizipenetik jaun goikoa sortzera, eta nola jo duten mistiko guztiek Infinitu esanezinerantz, jaun goikoaz harago. Azkenik, teologia eta kristologia metaforiko berri baten funtsezko ildoak eta ezinbesteko berrinterpretazioak proposatzen ditu.

Galdera deserosoak zabalik utziz ixten da liburua: posible ote da bestelako kristautasuna? Zein dira baldintzak? Ausartuko ote dira eliz erakundeak? Eta bestela zer?